Ноокат районунда дайынсыз жоголгондор изделүүдө
Ноокат районунда 28-29-июнь күндөрү болгон сел учурунда Ош-Разаков-Баткен унаа жолунун 63-чакырымында Абшыр-Сай аймагындагы көпүрө бузулган. Өзгөчө кырдаалдар министрлигинин маалыматына караганда, сел аймактагы 31 турак жайдын короолорун да каптаган.
Өзгөчө кырдаалдар министрлигинин кызматкерлери башка кызматтар жана жергиликтүү тургундар менен биргеликте селдин кесепеттерин жоюу жана тазалоо иштерин активдүү жүргүзүүдө. Издөө-куткаруу иштерине жалпысынан 374 адам тартылып, анын ичинен Өзгөчө кырдаалдар министрлигинин 67 куткаруучусу, ошондой эле 28 техника жана жарандык коргонуунун 37 кызматкери бар. Жалпысынан 120 жергиликтүү тургун тартылган. Алардын жарымы кесепеттерин жоюу менен алек болсо, экинчи жарымы дайынсыз жоголгондорду издөөдө.
Ошол эле учурда жергиликтүү тургундар ӨКМдин аракеттерине нааразы болуп, алардын айтымында, атайын техникалар жетишсиз болуп, Ош-Разаков-Баткен унаа жолунун бир бөлүгүндө жергиликтүү тургундар жолду тосуп алышкан. Муну менен алар өзгөчө кырдаалдар министрлигинин өкүлдөрүнүн көңүлүн бурдургулары келишкен. Натыйжада атайын техникалар келип, көпүрөнүн астындагы тыгынды тазалашкан. Күбөлөрдүн айтымында, кесепеттерди жоюуга жана дайынсыз жоголгондорду издөөгө жергиликтүү тургундардан 1000ден ашуун адам тартылган.
Эске салсак, 28-июнда Жалал-Абадда орун алган аномалдуу жаандан улам сел каптап, сегиз адам каза болуп, Апшыр-Атада калган 1300 адам коопсуз жакка куткарылган.
