Ички иштер министрлигинин кызматкерлери 60 миллион сомдук маңзатты аныкташты
Кыргызстандын Ички иштер министрлигинин Баңгизаттарды мыйзамсыз жүгүртүүгө каршы күрөшүү кызматы 60 миллион сомдук маңзатын аныктады. Бул тууралуу милициядан кабарлашты.
Атайын кызмат уюшкан кылмыштуу баңги тобунун мүчөлөрү тарабынан Кыргызстанга жакынкы жана алыскы чет өлкөлөрдөн баңгизаттарды ташып келүү үчүн туруктуу канал, ошондой эле синтетикалык баңги заттарды өндүрүү боюнча нарколабораториялар ачылганын аныктаган. Аны интернет аркылуу андан ары жайылтууну максат кылышкан.
Тергөөнүн версиясы боюнча, бул уюшкан кылмыштуу топтун лидерлери "кураторлор" болгон. Алар топтун мүчөлөрүнүн ортосунда ролдорду бөлүштүрүп, кампачылар, дүң сатуучулар, таңгакчылар жана күрөөчүлөр делгендерге атайын окуутууларды өткөрүшкөн. Белгиленгендей, топтун мүчөлөрү бири-бирин тааныбайт жана жашыруундук чараларын катуу сакташкан.
Бул уюшкан кылмыштуу топко катыштыгы бар деген шек менен жалпысынан 18 жаштан 35 жашка чейинки Кыргыз Республикасынын 13 жараны кармалды. Алардын үчөө милиция кызматкерлери. Кармалгандардын бардыгына камакка алуу түрүндөгү баш коргоо чарасы тандалды.
Мыйзамсыз жүгүртүүдөн жалпы баасы 60 миллион сомдон ашык 12 кг синтетикалык баңги заты алынган.
"Бул баңги каражаттарынын жана жаңы психоактивдүү заттардын эркин кирүү жана таратуу менен жалпы суммасы 18 миң бир жолку дозаны түзүп, Кыргыз Республикасынын улуттук коопсуздугуна эбегейсиз зыян келтириши мүмкүн", - деп ишендирет кызмат.
