Муфтийликке алты адам ат салышууда. Алар тууралуу кызыктуу маалыматтарды таап чыктык
29-майда өтө турчу Кыргызстан Мусулмандарынын Курултайында Аалымдарр Кеңеши тарабынан тандалып алынган муфтийдин талапкерлигин бекитишет. Муфтийликке сегиз талапкер катталып, алардын алтоосу гана документтер текшерилгенден кийин тандалып алынып, 21-майда өтө турган сынакка жолдомо алышты.
Бул макалада Kaktus.media Кыргызстан Мусулмандарынын Муфтийинин кызмат ордуна талапкерлеринин бизге белгисиз тараптарын ачып берүүгө аракет кылды. Маалымат ачык булактардан алынды. Алты талапкердин төртөө буга чейин КМДБ тутумунда иштеген, ал эми бир талапкер маркум Чубак ажы Жалилов муфтий болуп турганда аны менен пикир келишпестикке учураган жайы бар.
Султанали Гапуров
Султанали Гапуров - КМДБнын даават (динди жайылтуу) бөлүмүнүн адиси. Бул талапкер Мамлекеттик дин иштери боюнча мамлекеттик комиссиянын экс-башчысы Акин Токталиевдин муфтияттагы ызы-чуусунан кийин дароо эле муфтийликке өз талапкерлигин көрсөтүп жатканы белгилүү болгон. Талапкерлерди каттоо аяктагандан кийин бул маалымат тастыкталды.
Гапуров бир эмес, эки компаниянын биргелешкен негиздөөчүсү: "Эс Ти Ай Травел" туристтик агенттиги жана "Аль-Фатх" ЖЧКсы.
Убайдулла Сарыбаев
Убайдулла Сарыбаев - Ош шаарынын мусулмандар казысы. Ал 1968-жылы 11-декабрда Ош облусунун Тээк айылында туулган. 2010-жылы муфтийдин орун басары болгон. Кийинчерээк Чубак Ажы Жалилов КМДБнын башчысы болуп турганда, Сарыбаев аны түштүк региондорундагы диний лидерлердин кадыр-баркына шек келтирип, коррупциядан өзүн оолак көрсөткүсү келген деп айыптаган.
Нематилла Жээнбеков
Нематилла Жээнбеков 1968-жылы 10-мартта Жалал-Абад облусунун Сузак районундагы Акчалуу айылында туулган. Ал төрт жогорку окуу жайын аяктаган, анын үчөө диний. 1998-жылдан бери КМДБнын тутумунда иштеп, 2003-2006-жылдары Кыргызстан Ислам Университетинин ректору, 2010-жылы муфтийдин кеңешчиси болгон. Бүгүнкү күндө Жалал-Абад облусунун казысы. Ал беш тилде - кыргыз, орус, өзбек, араб жана түрк тилдеринде сүйлөйт.
Ошондой эле ал osoo.kg сайтында Кыргызстан Мусулмандарынын Дин Башкармалыгынын Ажылык-Умра борборунун директору катары көрсөтүлгөн.
Ниязали Арипов
Ниязали Арипов муфтийликке 2017-жылы эле арыз берген. Ал "Республика" саясий партиясынан V чакырылыштагы Кыргыз Республикасынын Жогорку Кеңешинин депутаты Назарали Ариповдун иниси.
Ниязали Арипов 1974-жылы 17-майда Баткен облусунун Лейлек районундагы Кара-Булак айылында туулган. Түркияда жана Иорданияда тажрыйба топтоп келген. Ал Ош облусунун казысы, Ош мамлекеттик университетинин ага окутуучусу болгон. Учурда ал Кыргызстан Мусулмандарынын Дин Башкармалыгынын алдындагы "Вакф" фондунун директору.
Ал эми талапкерлер Нурбек Токтогулов жана Шүкүр Исмаилов жөнүндө ачык булактарда маалыматтар жок.
Сегиз талапкердин экөөсү документалдык тандоодон өтпөй калды.
Алгач сегиз талапкер болгон, бирок Сайдамир Джейналиев менен Шакир Маматов экзаменге жана кийинки шайлоого документалдык текшерүүдөн кийин киргизилген эмес.
Саидамир Джейналиев жөнүндө болгону анын Кыргызстан Аалымдар Кеңешинин мүчөсү экендиги белгилүү.
Шакир Маматов буга чейин Ош шаарында Казы болуп иштеген. 2012-жылы ал кызматынан ызы-чуу менен куулган. Андан кийин КМДБ жума намаз учурунда Шакир ажы Маматов динге ишенгендерге этностор аралык мамилелерге байланыштуу суроолорду берүүгө уруксат бергендиги маалым болгон. Бул кызматтан бошотууга негиз болуп берген, бул боюнча Шакир ажы Маматов Оштогу чогулушта нааразычылыгын билдирген эле:
"Өзбек имамдарынын кызматтан алынышына жана кыргыз дин кызматкерлеринин шаар мечиттерине тартылышына байланыштуу айыптоолор негизсиз. Мен Кыргызстандын муфтийи Чубак ажы Жалиловдун жасаган кадамдарын түшүнбөйм. Жана анын чечимине макул эмесмин."
Балким, мен жагымсыз, тилим курч, ороймун, бирок эки улуттун өкүлдөрүнүн ортосунда бөлүнүп-жарылчу сөздөрдү эч качан айткан эмесмин.
