Кемин районунда чиркөөнүн терезесин талкалаган адам аныкталды
Кемин шаарынын Панфилов көчөсүндө жайгашкан чиркөөнүн терезелерин белгисиз адамдар сындырып кетишкен. Жергиликтүү тургундун арызынан кийин милиция шектүүнү кармады.
Чүй ОИИББден кабарлашкандай, 24-июлда Кемин РИИБине Кемин шаарынын 1963-жылы туулган П.Л. аттуу тургуну кайрылып, чиркөөнүн терезелерин талкалап кеткен белгисиз адамдарга чара көрүүнү өтүнгөн.
Бул факты Кемин РИИБине катталып, 280-берененин негизинде кылмыш иши козголгон. Тергөөгө чейинки текшерүү иштеринин жүрүшүндө ушундай эле арыз менен дагы 3 жаран кайрылган.
Ыкчам тергөө иштеринин жүрүшүндө кылмышка шектелип 1977-жылы туулган И.Р. аттуу жаран кармалды. Учурда тергөө иштери уланууда.
Кемин районунда комплекстүү алдын алуу иш-чаралары жүргүзүлүп, район аймагында улуттар аралык чыр-чатак жана башка диний пикир келишпестик фактылары аныкталган жок дешет милициядан.
