Августтан тарта Бишкек-Балыкчы поездинде VIP вагону ишке киргизилет
Бишкек-Балыкчы-Бишкек поездинин курамына VIP-купе вагону киргизилет. Бул тууралуу "Кыргыз темир жолу" ишканасы кабарлады.
Маалымдалгандай, 1-августтан баштап поезддин курамына VIP-купе категориясындагы дагы бир жогорку комфорттогу вагон киргизилет. Вагондун ичинде 6 купе бар, алардын ар биринде жумшак дивандар, кенен стол, панорамалык терезелер, электрондук түзүлүштөрдү кубаттоо үчүн USB жана Type-C туташтыргычтар, аудио-стерео система, ар бир купеде абаны муздатуу системасы каралган. Ички жасалгасы улуттук стилде кооздолгон.
Билеттерди ticket.railway.kg сайтынан жана анын Android жана iOS мобилдик тиркемелеринен, ошондой эле Эркиндик бульвары 1А дарегинде жайгашкан Бишкек-2 бекетинин кассаларынан сатып алса болот.
Эске салсак, 2023-жылдан тарта Бишкек-Балыкчы багыты боюнча жалпы класстагы VIP вагону менен поезд жүрө башатаган.
