Балыкчыдагы жаңы пирсте коргоо чаралары күчөтүлүүдө
Балыкчыдагы жаңы курулган пирстин аймагында коопсуздукту жана укук тартибин сактоо боюнча комплекстүү иш-чаралар жүрүүдө. Бул тууралуу Балыкчы ШИИБнин Коомдук коопсуздук кызматы билдирди.
Эс алуучулар жана шаар тургундары үчүн ыңгайлуу, коопсуз чөйрөнү түзүү максатында пирсте жана ага чектеш аймактарда үзгүлтүксүз патрулдук кызмат жүрүүдө. Бул иш-чаралардын алкагында эскертүү белгилерин жайгаштыруу жана кошумча коопсуздук чараларын белгилөө каралган.
Кызматкерлердин негизги милдеттери - укук бузуулардын алдын алуу, тартипти камсыз кылуу, ошондой эле ар кандай өзгөчө кырдаалдарга ыкчам чара көрүү болуп саналат. Жээктеги коопсуздуктун жалпы деңгээлин жогорулатуу үчүн жергиликтүү тургундар жана эс алуучулар менен өз ара аракеттенүү маанилүү.
"Биз жергиликтүү тургундар жана коноктор үчүн коопсуз, ыңгайлуу эс алуунун маанилүүлүгүн билебиз, ошондуктан "Грин Сити" жаңы пирсинде тартипти камсыз кылуу үчүн бардык зарыл чараларды көрүп жатабыз", - деп белгиледи Балыкчы ШИИБдин башчысынын орун басары Абыканов Жеңишбек.
Коомдук коопсуздук бардык эс алуучуларды пляждын аймагында жүрүм-турум эрежелерин сактоого жана укук коргоо органдарынын көрсөтмөлөрүн аткарууга чакырат. Өзгөчө кырдаалдар жаралган учурда тургундар жана коноктор жеринде иштеген кызматкерлерге кайрылып же милиция бөлүмүнүн нөөмөт кызматына чалса болот.
