Көлдө ӨКМнын тик учагы пляждын үстүнөн учуп, эс алуучуларды кабатыр кылды
Өзгөчө кырдаалдар министрлигинин тик учагы Булан-Соготту айылындагы пансионаттын пляжын айланып учкан. Бул тууралуу Kaktus.media сайтына эс алуучулар билдиришти.
Алардын айтымында, бүгүн, 12-августта саат 12:40 чамасында тик учак пляждын үстүндө өтө төмөн учуп, эки айлампа жасаган.
"Бул эс алуучуларды, анын ичинде балдарды аябай коркутту. Мындай төмөн учуу коопсуздук эрежелерин бузууга киреби?", - дешет күбөлөр.
Өзгөчө кырдаалдар министрлигинен редакцияга бул боюнча комменатрий берип, "мындай жапыз учуу кадыресе көрүнүш, ага көнүү керек" дешти. Министрлик бул рейс коммерциялык же жумушчу экенин тактаган жок.
Белгилесек, 11-августта жааган жамгырдан улам Чолпон-Ата шаарында жана Бактуу-Долоноту айылында сел жүрдү. Өзгөчө кырдаалдар министрлигинин кызматкерлери учурда кырсыктын кесепеттерин жоюуда.
