УТРКнын директорунун мурдагы орун басары Акжол уулу Адыл кармалды
"ЭлТР" мамлекеттик телерадиоберүү компаниясынын башкы директорунун экс-орун басары Акжол уулу Адыл кармалды. Бул тууралуу Kaktus.media сайтына өздүк булактар билдирди. Маалыматты Бишкектин Биринчи Май райондук сотунан да тастыкташты.
Белгилүү болгондой, райондук соттун 5-августтагы чечими менен УКМКнын Башкы тергөө башкармалыгынын тергөөчүсүнүн өтүнүчү канааттандырылган.
"Кылмыш-жаза кодексинин 278-беренесинин 3-бөлүгү "Бийлик өкүлдөрүнүн мыйзамдуу талаптарына активдүү баш ийбөөгө жана массалык баш аламандыкка, ошондой эле жарандарга зомбулук көрсөтүүгө чакырыктар" беренеси боюнча айыпталган А. уулу А. 2024-жылдын 4-октябрына чейин камакка алынды, - деп билдиришти соттон.
Белгилей кетсек, Акжол уулу Адыл эркин журналист, блогер жана ютубер. Анын YouTube каналында дээрлик 800 миң катталуучусу бар.
Ал 2020-жылы УКМК тарабынан кармалган.
ЭлТРдин башкы директорунун орун басары болуп 1,5 жыл иштеген. Өткөн жылдын июль айында ал УТРКга ушундай эле кызматка келген, бирок мамлекеттик телекорпорациядан качан кеткени белгисиз.
