Акылбек Жапаров башка министрликтерге ИИМден үлгү алууну сунуштады
Министрлер кабинетинин башчысы Акылбек Жапаров министрликтердин жана ведомстволордун жетекчилерине ИИМден үлгү алууну сунуштады. Бул туурасында ал 3-сентябрда Ички иштер министрлигинин бөлүктөрүнө кызматтык унааларды тапшыруу иш-чарасында айтты.
"Учурдан пайдаланып, өлкөбүздөгү башка министрликтердин жана ведомстволордун жетекчилерине ушул Ички иштер министрлигинен үлгү алгыла деп айтмакчымын. Талдоо боюнча карап көргөндө Ички иштер министрлигинин автопаркы 2009-жылы 45-50% жаңыланып, андан бери 2021-жылга чейин жаңыланган эмес. 2021-жылдан баштап акырындык менен жаңыланып отуруп, азыркы тапта 90% автопаркы жаңыланды. Андан тышкары акыркы үч жылда ички иштер органдарынын кызматкерлеринин айлык-маянасы эки эсеге, ал эми Баткен жергесинде кызмат кылган кызматкерлердин айлыгы төрт эсеге жогорулады", - деди.
Акылбек Жапаров ички иштер органдарынын кызматкерлери заманбап талаптарга жооп берген технологиялар менен иштөөнүн натыйжасында акыркы үч жыл аралыгында кылмыштуулук 50% төмөндөп, коомдук жайларда одоно тартип жана мыйзам бузуулар азайып, бирдей тартип жана туруктуулук орной баштаганын кошумчалады.
