Орзубек Назаров УКМКга сурак берди
Бокс боюнча дүйнөнүн 7 жолку чемпиону Орзубек Назаров УКМКга сурак берди. Мамлекеттик коопсуздук комитетинен Назаров өзбекстандык Салимбай байбача каймана аты бар кримавторитет менен байланышы бар экендиги аныкталган дешет.
"3-сентябрда Кылмыш-жаза кодексинин 263-беренеси ("Уюшкан топторду жана кылмыштуу жамааттарды каржылоо") боюнча козголгон кылмыш ишинин алкагында О.П.Назаров УКМКнын тергөө органдары тарабынан Салим Абдувалиев менен жолугушуусу жана таанышуу жагдайлары боюнча суракка алынды", - деп айтылат маалыматта.
Учурда аталган кылмыш ишинин алкагында С.Абдувалиевдин кылмыш ишине тиешеси бар башка кыргыз жарандарын аныктоо боюнча иш-чаралары уланып жатканын белгилешти УКМКдан.
Буга чейин Орзубек Назаровдун Салимбай байбача менен түшкөн сүрөтү чыккан. Мушкер ал жагдай боюнча буларды билдирди.
"2023-жылы Ташкенттеги Дүйнө чемпионатында мени жана иш-чарага катышкан топту түштөнүүгө чакырган. Тамактанып болгон соң тарап кеткенбиз. Өлкөнүн саясатын толугу менен колдойм. Криминалдык чөйрөдөгү Салимбай байбача менен байланышым болгон эмес жана колдобойм", - дейт.
