Россияда терезеден кулаган кыргызстандык кыздын окуясы: Шектүүлөр кармалды
Санкт-Петербургда 22 жаштагы кыргызстандык кыз 6-кабаттан кулап кеткен окуя боюнча Тышкы иштер министрлиги комментарий берди.
Белгилесек, бир катар маалымат каражаттары кызды белгисиз адамдар 6-кабаттагы батирдин терезесинен ыргытып жиберишкенин, андан кийин аны унаага салып кетүүгө аракет кылышканын жазышкан.
Тышкы иштер министрлиги тактагандай, 3-сентябрда саат 02:00 чамасында окуя болгон жерге милиция кызматкерлери барган. Жабырлануучу 2002-жылы туулган А.Б., экени такталып, көптөгөн жаракаттары менен ооруканага жеткирилген. Учурда абалы туруктуу оор деп бааланууда.
Окуяга катыштыгы бар деген шек менен Кыргызстандын 2001-жылы туулган М.Б жана С.Ш аттуу жарандары кармалганы маалым болду. Россиянын укук коргоо органдары бул факты боюнча иликтөө иштерин жүргүзүүдө.
Кыргыз Республикасынын Санкт-Петербург шаарындагы Башкы консулдугу Россиянын тиешелүү органдары менен байланышта деп айтылат маалыматта.
