Эмгек министрлиги: Ошто атасы кордогон баланы коргоонун жекече планы түзүлдү
Ошто атасынан зомбулук көргөн баланын ишин Эмгек, социалдык камсыздоо жана миграция министрлиги көзөмөлгө алды. Учурда баланын үй-бүлөсү менен тиешелүү иш башталганын ведомствонун басма сөз кызматы билдирет.
Белгилүү болгондой, үй-бүлө Ош облусунун Алай районунда жашайт. Райондук башкармалыктын маалыматы боюнча, балада ур-токмоктун белгилери жок.
Баланын атасы видеону эмгек миграциясында жүргөн аялын үйүнө алып келүү үчүн тарткан.
"Учурда баланы коргоонун жекече планы түзүлүп, териштирүү иштери бүткөнгө чейин жана үй-бүлө менен тактоо иштери аяктаганга чейин бала багып алуучу фостердик үй-бүлөгө жайгаштырылды", - дешти министрликтен.
12-сентябрда социалдык тармактарга баланы урушуп, андан кийин "Күндө урам! Эшикке уктайсың!" деп баланы бөлмөдөн чыгарып салган кишинин видеосу тараган. Кийичерээк Ош ОИИБи видеодогу жаран аныкталганын, текшерүү башталганын кабарлады.
