Министрлик бүтүрүүчүлөрдү мектебине жардам көрсөтүүгө чакырды
Билим берүү жана илим министрлиги бүтүрүүчүлөрдү өздөр окуган мектепке жардам көрсөтүүгө чакырат. Мекеме "Өз мектебиңди колдо!/Поддержи свою школу!" челленджин баштады.
"Челленджге билим берүүнүн өнүгүшүнө кызыкдар болгондор жана өздөрү окуган мектептин материалдык-техникалык базасын жакшыртууну каалаган жарандар катыша алышат. Мисалы катары айтсак, Ш.Жээнбеков атындагы лицей-интернаттын бүтүрүүчүлөрү мектептин чоң залын оңдоп-түзөө үчүн "Бүтүрүүчүлөр ассоциациясын" түзүштү", - дешет ведомстводон.
Эске салсак, 2023-жылы Садыр Жапаров окуучулардын ата-энелеринен акча чогултууга тыюу салган жарлык чыгарган, бирок ата-энелер дагы эле классты тазалоого жана башка мектеп чыгымдарына акча чогултууга мажбур экенин айтып келишет.
Белгилей кетсек, кызматкерлердин маянасы, окуучулардын тамак-ашы, окуу китептерин басып чыгаруу республикалык бюджеттен каржыланат. Коммуналдык чыгымдар, имараттарды оңдоо жана күтүү жергиликтүү бюджеттин эсебинен каржыланат. Андан сырткары бюджетке кирбей калган чыгашалар да бар. Аларды дагы деле ата-энелер каржылайт.
Башкы беттеги сүрөт иллюстрациялык.
