Тергөө изоляторунда шектүү эс-учу жоголгончо сабалып, тиштери сынган
Нарында шектүү катары кармалган жаранды милиция кызматкерлери кыйноого алган. Бул туурасында Кыйноолорду алдын алуу боюнча улуттук борбордун маалыматында айтылат.
Аталган борбордун билдирүүсүнө караганда, №24 тергөө изоляторунда шектүү катары отурган А.Н. жана Б.Н. Ак-Талаа РИИБдин кызматкерлери тарабынан кыйноого алынгандары тууралуу арыз менен кайрылышкан.
Арыздын негизинде улуттук борбордун кызматкерлери А.Н. менен сүйлөшкөн. Айтымында, күбө катары кармалган кайниси Б.Н. экөө кыйноого кабылышкан. Ал эми жубайы А.Н. коркутууга жана моралдык кысымга кабылганын билдирген.
Улуттук борбор тарабынан кыйноонун жана катаал мамиленин издерин документтештирүү боюнча медициналык кароо формасын (Стамбул протоколу) толтурулуп, топтолгон материалдар тергөө иштерин жүргүзүү үчүн УКМКга өткөрүлүп берилди.
