Чек арадагы кырдаал. Ташиев Тажикстандын УКМК башчысы менен сүйлөшүүлөрдү жүргүздү
Кыргызстан менен Тажикстандын Улуттук коопсуздук мамлекеттик комитетинин башчылары Камчыбек Ташиев менен Саймумин Ятимовдун эки өлкөнүн чек арасындагы кырдаал боюнча сүйлөшүүлөрү аяктады.
"Азаттыктын" кабарчысы Ош облусунун Чоң-Алай районунан кабарлагандай, Ташиев журналисттерге билдиргендей, тараптар сегиз пункттан турган протоколго кол коюшту. Документтин чоо-жайы кийинчерээк жарыяланат. Учурда тараптар чек арадан аскерлерди чыгарып кетүү боюнча макулдашканы белгилүү болду. Ошондой эле, эвакуацияланган жарандар үйлөрүнө кайтышат.
Эске салсак, 4-июнда УКМКнын башчысы Камчыбек Ташиев кырдаалдын курчушуна байланыштуу Тажикстан менен чек арага учуп кеткен. Тажик тарап кыргыз-тажик чек арасын делимитациялоо жана демаркациялоо боюнча өкмөттөр аралык делегациялардын келишимдерин бузуп, 4-июнь күнү болжол менен саат 03:00 чамасында, Ош облусунун Чоң-Алай районунун Унжу-Булак аймагындагы чек аранын тактала элек бөлүгүнө контейнер орното баштаган. Кыргызстандын аймагына 1 000 метрге чейин кирип келген.
Ташиев, делегациянын коштоосунда министрлер кабинетинин чек ара маселелери боюнча атайын өкүлү Назирбек Бөрүбаев жана Жер ресурстары боюнча мамлекеттик агенттиктин директору Абдулат Мырзаев менен бирге республиканын түштүгүнө учуп кеткен. Кийинчерээк бортунда 15 адам болгон тик учактын авариялык конушу жөнүндө белгилүү болгон эле.
