"Бизнес кекенип отурат." Депутат каалаган жерге унаа токтотууга уруксат берүүнү сунуштады
Депутат Бактыбек Турусбеков мүмкүн болушунча Бишкек шаарында унаа токтотууга уруксат берүүнү сунуштайт. Бул тууралуу ал бүгүн, 8-июнда Жогорку Кеңештин Мыйзамдуулукту сактоо жана кылмыштуулукка каршы күрөшүү боюнча комитетинин отурумунда билдирди.
Анын айтымында, шаарда Манас проспектиси менен Ахунбаев көчөсүнөн Чүй проспектисине чейин өлкө башчысына кам көрүү жана аларды коштоого жамынып, бардык унаа токтотуучу жайлар алынып салынды.
"Ар бир унаа токтотуучу жайдын артында кичинекей бизнес бар. Мисалы, ири борборлорго, маселен, Бабановдукуна, мейманканаларга, унаа токтотууга уруксат берилген, ал эми гүл саткан дүкөндөргө, чачтарачтарга, акча алмаштыруучу бюролорго тыюу салынган бул эмне деген адилетсиздик. Ал жерлер Усубалиевдин мезгилинен бери эле бар. Алар Жапаровго чейин эле бар болчу, андан кийин биринчи адамдар өтүп жаткандыктан алынып салынган. Буга бардык ишкерлер кекенип отурат. Унаа токтотууга уруксат бериңиз, бирок акы төлөшсүн. Борбордо кымбатыраак болсун", - деди депутат.
Ал кошумчалагандай, мамлекеттик органдар унаа токтотуучу жайларды алып салышкан, бирок унааларды токтотууга шарт түзгөн эмес.
Бул кайрадан МАИ кызматкерлери үчүн пара алуу мүмкүнчүлүгү. Биз: "Ура, биз ишкерлерди колдойбуз деп төш кагып жатабыз!" Бирок оң колу менен уруксат берип, сол колу менен алып коюуунун эмне кажети бар эле. Туура эмес жерге унаа токтоткону үчүн айыппул салуунун кажети жок, унаа токтоткон жай үчүн төлөм алуу керек.
Ички иштер министрлигинин Жол кыймылынын коопсуздугун камсыздоо башкы башкармалыгынын башчысынын орун басары Ыманалы Саркулов бул маселе татаал деп эсептейт. Бирок, анын айтымында, кыймылды уюштурууга жергиликтүү өз алдынча башкаруу органдары жооптуу.
"Биз коопсуздукка доо кетириши мүмкүн болгон маселелерди чечүү боюнча гана сунуштарды берип жатабыз", - деп кошумчалады ал.
