Алмазбек Атамбаев менен Фарид Ниязовго каршы жаңы кылмыш иши козголду
Экс-президент Алмазбек Атамбаевге жана анын кеңешчиси Фарид Ниязовго каршы "Коррупция" беренеси боюнча жаңы кылмыш иши козголду. Бишкек шаардык ички иштер башкармалыгынын билдиришине караганда, бул Түркиянын атайын кызматы тарабынан уурдалган Орхан Инанда менен тыгыз байланышкан иш.
"2016-жылы Кыргыз Республикасынын паспортторун мыйзамсыз берүү фактысы менен "Коррупция "беренеси боюнча кылмыш иши козголгон.
Иликтөөнүн жүрүшүндө 2016-жылы Фарид Ниязов жетектеген Президенттин алдындагы Жарандык боюнча комиссиянын төрагалыгы астында он түрк жаранын Кыргызстандын жарандыгына кабыл алуу боюнча мыйзамсыз чечим кабыл алынгандыгы аныкталды. Ошол эле жылы президент Алмазбек Атамбаевдин жарлыгы менен Түркиянын он жараны Кыргызстандын жарандыгына кабыл алынып, аларга Кыргыз Республикасынын паспорттору мыйзамсыз берилген ", - деп билдирди Ички иштер башкы башкармалыгы.
Министрлик кошумчалагандай, учурда тергөө иш-чаралары жана ыкчам-издөө иш-чаралары сотко чейинки процесстин алкагында бардык тиешеси бар адамдарды аныктоо үчүн улантылып жатат.
Белгилей кетсек, буга чейин түркиялык ММКлар Орхан Инанды Түркиядан качып келген жарандарга кыргыз жарандарынын паспортун алууга жардам берген деп билдиришкен.
