Кыргызстанда эл аралык террористтик уюмдун мүчөсү колго түштү
Бүгүн, 22-июлда УКМК кызматкерлери өнөктөш атайын кызматтар менен биргеликте чет элдик согушкер Х.Анын ишмердүүлүгүн зыянсыздандырышты, деп билдирди УКМКнын басма сөз кызматы.
Кыргызстанга чет элдик жаран диверсиялык иштерди жүргүзүү үчүн келгени аныкталды. Ал айрым өлкөлөрдүн террордук подпольеси менен туруктуу байланышты сактап, аларга идеологиялык колдоо көрсөтүп, КМШ өлкөлөрүнүн биринин аймагында жанкечти-террористке ("шейит") айланмакчы болгон.
Кыргыз Республикасынын Улуттук коопсуздук мамлекеттик комитети Афганистандагы аскердик-саясий кырдаал менен коомдук-саясий кырдаалды дестабилдештирүү үчүн террористтерди ар кайсы өлкөлөргө жиберген эл аралык террористтик уюмдардын активдешүүсү менен байланышын белгилейт. Көрүнүштөрүнүн бири - диний-экстремисттик деструктивдүү идеологияны жайылтуу.
Ушуга байланыштуу, КР УКМКсы кыргызстандыктарды сак болууга жана шектүү уюмдар менен агитаторлор боюнча токтоосуз кабар берүүгө чакырат.
