Тажикстандыктар Баткен облусундагы президенттин өкүлүн ташбараңга алышты
Кыргыз-тажик чек арасында кыргыз делегациянын машинелери ташбараңга алынды. Бул тууралуу Kaktus.media редакциясына Баткен облусунун ИИБси билдирди.
Такталган маалыматка ылайык, 29-июлда президентин облустагы ыйгарым укуктуу өкүлүнүн орун басары Маруфахан Тулаев, Баткен облусундагы чек-ара айылдарын калыбына келтирүү маселелери боюнча президенттин атайын өкүлү Мамыржан Рахимов жана Ак-Сай айыл өкмөтүнүн жетекчиси Алимбек Сабиров Таш-Тумшук айылына курулуш иштеринин жүрүшү менен таанышуу үчүн келишкен.
ИИБ билдиргендей, Таш-Тумшук айылына Ворух анклавы аркылуу өтсө болот. Анын аймагына кирген кыргызстандык чиновниктердин унаасын Тажикстандын жарандары ташбараңга алышкан.
"Окуя болгондон кийин, милиция Исфара-2 РИИБсинин жетекчилери менен жолугуп, алар кыргыз тарапка келтирген зыянды толугу менен калыбына келтирүүнү убада кылышты", - деп ИИМден баса белгилешти.
Башкы беттеги сүрөт иллюстративдүү.
