Тоодо белгисиз адамды өлтүрүүгө шектүү Бишкекте селсаяктардын арасында жашынып жүргөн
Чүй облустук ички иштер башкармалыгынын жана Москва райондук ички иштер бөлүмүнүн кызматкерлери Ау-Суу капчыгайында белгисиз адамды өлтүрүүгө шектүү жаранды кармашканын Чүй облустук ИИБдин басма сөз кызматы билдирди.
2021-жылдын 10-июлунда Ак-Суу капчыгайындагы жайлоодо 55-60 жаштардагы белгисиз азиат улутундагы адамдын сөөгү күч колдонулган өлүмдүн белгилери менен табылган. Алар Кыргыз Республикасынын Кылмыш-жаза кодексинин 130 "Киши өлтүрүү" беренесинин негизинде кылмыш ишин козгошуп, сотко чейинки иликтөө башталды.
Милиция киши өлтүргөн делген адамды аныктап, издөөдө жүргөндөрдүн тизмесине киргизди.
Кылмышка шектүү, 1967 -жылы туулган Н.А., Бишкекте укук коргоо органдарынын кызматкерлеринен жашырынып, ал жерде селсаяктар менен бирге жашап жүргөн.
Шектүү Москва РИИБдин убактылуу кармоочу жайына киргизилди.
Өлтүрүлгөн адамдын өздүгү азырынча аныктала элек. Алдын ала маалыматтар боюнча, экөө тең мурда бир малчынын жайытында малчы болуп иштеген.
Учурда тергөө иштери уланууда.
