"Бийликти басып алууга аракет кылган". УКМК депутат Бактыбек Жетигеновду кармады
УКМК Жогорку Кеңештин учурдагы депутаты Бактыбек Жетигенов менен "Чүй ынтымагы" коомдук бирикмесинин мүчөсү Алмаз Мусакеевди бийликти күч менен басып алуу аракети үчүн кармады. Бул тууралуу Kaktus.media сайтына күч түзүмдөрүндөгү булактар билдирди.
Алар 26-ноябрда өлкөдө бийликти басып алууга аракет кылган деп шектелген башка адамдар менен бирге кармалганы кабарланды.
Кечээ, 27-ноябрда сот Бактыбек Жетигеновдун баш коргоо чарасын аныктады - ал тергөө аяктаганга чейин эки ай СИЗОдо болот.
Буга чейин УКМК өлкөдө бийликти күч менен басып алууну пландаган кылмыштуу топтун ишмердүүлүгү токтотулганын билдирген. Маалым болгондой, буга чейин күч органдарына шайлоодон кийин дароо республикадагы кырдаалды туруксуздаштыруу максатында провокацияларды уюштуруп, андан соң бийликти күч менен басып алууну пландаган адамдар тобу тууралуу маалымат түшкөн. Аталган факты боюнча КРнын Кылмыш-жаза кодексинин "Бийликти күч менен басып алууга даярдануу" беренеси боюнча кылмыш иши козголгон.
"Эл ынтымагы" партиясынын лидери Аскат Темралиев, "Жашылдар" партиясынын мүчөлөрү Сүйөркулов Нурис Жумабаевич, Акматбеков Руслан Автандилович жана Купешев Бекназар Эсенгуловичтин кармалганы белгилүү болду. Андан сырткары Азамат Мусакеев менен Нурбек Калекеев дагы кармалган.
