БШКнын шайлоо маалымат системасынын сайтында кайрадан көйгөйлөр жаралды
Шайлоонун маалыматтык системасынын сайтында мүчүлүштүктөр кайталанууда.
Өткөн түнү колдонуучулар сайтта маалыматтардын туура эмес көрсөтүлүшүн билдиришти. Анда бардык партиялар 0% болчу.
Бул көйгөй бүгүн эртең менен да кайталанды. Бул жолу сайтта эч кандай маалымат көрсөтүлгөн эмес.
Эске сала кетсек, 28-ноябрда алдын ала эсептөө учурунда система бузулуп, андан кийин жыйынтыктар өзгөргөн. Кээ бир партиялар, анын ичинде "Ата Мекен" партиясы он миңдеген добушун жоготкон болчу. Партиялар фальсификацияларды жарыялап, шайлоону тааныбай, 28-ноябрдагы шайлоонун жыйынтыгын жокко чыгарууну талап кылышты.
БШК система туура иштеп жатканын билдирди. Бирок БШК кызматкеринин айынан шайлоо маалыматтык веб-сайтында маалыматтарды көрсөтүүдө ката кеткен. Бул ишти Улуттук коопсуздук боюнча мамлекеттик комитети иликтеп жатат.
