УКМК Бактыбек Калмаматовго козголгон кылмыш ишинин чоо-жайын жарыялады
Бактыбек Калмаматов аймактар аралык кастыкты козуткан деп кармалган. Бул тууралуу Улуттук коопсуздук мамлекеттик комитети билдирди.
Мамкомитет окуянын жүрүшүндө Жогорку Кеңештин мурдагы депутаты Бактыбек Калмаматов социалдык тармактар аркылуу аймактар аралык кастыкты козутууга катыштыгы бар деген маалымат түшкөнүн билдирди.
"Бул факты боюнча КР Кылмыш-жаза кодексинин 330-беренесинин 1-бөлүгү менен аймактар аралык кастыкты козутуу (жек көрсөтүү) фактысы боюнча сотко чейинки өндүрүш иштери башталды. Тергөөнүн жүрүшүндө Калмаматовго карата алынган маалыматтар тастыкталды",- деп айтылат билдирмеде.
Маалым болгондой, Калмаматовго мыйзамда белгиленген мөөнөттө айып тагылып, баш коргоо чарасын тандоо маселесин Биринчи Май райондук соту карайт.
Эскерте кетсек, бүгүн, 22-декабрда Бактыбек Калмаматов учуп кетер алдында аэропорттон кармалганы белгилүү болгон. Жактоочунун айтымында, ал кичи ажылыкка бара жаткан.
