"Мадумаров жөн эле ызы-чуу жаратууда". Президенттин басма сөз катчысы мейманкана боюнча
"Мурда Мадумаров мырза өзүнүн бардык мамлекеттик, саясий же коомдук ишмердүүлүгүндө "Ысык-Көл" мейманканасын калыбына келтирүү зарылдыгын айтканы эсибизде жок", - деп билдирди президенттин басма сөз катчысы Эрбол Султанбаев Адахан Мадумаровдун билдирүүсүнө комментарий берип жатып. Мейманкананы бузуп анын ордуна президенттик сарайдын курулушу пландалууда.
Султанбаев белгилегендей, мейманкана Бишкектин аймагында жайгашкан жергиликтүү тарыхый жана маданий эстеликтердин реестринен чыгарылган, анткени имарат көп жылдар бою ишин токтотуп, эскилиги жетип, авариялык абалда. Президенттик администрациянын маалыматы боюнча, реконструкциялоо үчүн жаңы имараттын курулушу менен дээрлик бирдей эле сумма талап кылынмак.
"Мадумаровдун чет элдик инвесторлор тууралуу билдирүүсүнө токтоло турган болсок, бүгүнкү күндө кандайдыр бир чет элдиктерди тартуу маселеси арзыбаганын белгилейбиз. Бул саясатчы жөн эле ар кандай актуалдуу темаларга ызы-чуу жаратууга аракет кылып жаткансыйт", - деди басма сөз катчы.
Эске сала кетсек, буга чейин Мадумаров бийликти "Ысык-Көл" мейманканасын бузууну токтотууга чакырган.
