Көп мамлекеттер Жаңы жылды карантин чектөөлөрү менен тосту
Дүйнөнүн көп мамлекеттери коронавирустун жайылып жатканына байланыштуу карантин чектөөлөрү менен 2022-жылды тосушту.
Афины, Лондон, Париж, Берлин жана башка шаарларда негизги жаңы жылдык иш-чараларда беткап тагынуу милдеттендирилип жана фейерверк аттырууга тыюу салынган. Парижде адамдар көчөдө да беткап тагынып жүрүүгө тийиш. Канаданын Квебек шаарында коменданттык саат киргизилип, майрамдык шаан-шөкөттөр өтпөй калды.
Москванын жашоочулары жаңы жылды эч кандай олуттуу чектөөлөрү жок эле тосушту. Дубайда дагы коронавирус жайылып жактанына карабай эң бийик имараттан фейерверк атылып, лазердик шоу көрсөтүлдү.
Нью-Йорктун Таймс-сквериндеги жаңы жылдык шоуну көргөндөрдүн санына чектөө киргизилип, эмделген 15 миң адамдын чогулуусуна гана уруксат берилди. Бул пандемияга чейинки сандарга караганда кыйла аз.
Маалымат azattyk.org сайтынан алынды.
