Кыргыз аскерлеринин Казакстандан чыгарыла турчу күнү айтылды
ЖККУнун контингентиндеги кыргызстандык жоокерлер 14-январда Казакстандан мекенине кайтып келишет. Бул тууралуу Kaktus.media сайтына Коргоо министрлигинен билдиришти.
Маалым болгондой, аскерлер өз унаалары менен "Ак-Жол" көзөмөл-өткөрүү пунктуна келип, Токмоктогу туруктуу жайгаштырылган жерге жөнөшөт.
Эске салсак, ЖККУ 6-январда президент Касым-Жомарт Токаевдин өтүнүчү менен Казакстанга өз аскерлеринин контингентин жөнөткөн.
Кыргызстандан Казакстанга жалпысынан 25-Скорпион атайын багыттагы бригадасынан 150 аскер кызматкери, сегиз бронетехника жана 11 аскердик техника жөнөтүлгөн.
Россия Федерациясынын Коргоо министрлигинин расмий маалыматы боюнча, ЖККУнун контингентинин курамында элиталык бөлүктөр - Аба-десант күчтөрүнүн 45-өзүнчө атайын багыттагы бригадасы, 98-аба-десант дивизиясы жана 31-десанттык-шабуу бригадасы Казакстанга жөнөтүлгөн.
Армениянын Коргоо министрлиги Казакстанга 100 аскерден турган тынчтык күчтөрү жөнөтүлгөнүн жарыялады. Ведомство Армениянын куралдуу күчтөрүнүн бөлүгү стратегиялык объектилерди гана коргоону ишке ашыраарын билдирген. Беларус Казакстанга 103-аба-десанттык Витебск атайын күчтөрүнүн бригадасынын тынчтык орнотуучу ротасын жөнөткөн.
