Садыр Жапаров үч жыл эле окуп диплом алганбы? Биографиясындагы карама-каршылыктар
Жакынкы арада УКМК Садыр Жапаровдун көрсөтмөсү менен бардык мамлекеттик кызматкерлердин дипломун текшерет. Диплом боюнча тергөө иши жасалма диплом боюнча козголгон кылмыш ишинин айынан депутаттык мандатынан ажыратылган Орозайым Нарматованын окуясынан кийин козголду. Бул чуулгандуу окуянын фонунда окурмандарды кызыктырган суроо: Садыр Жапаровдун өзүнүн билими кандай?
Садыр Жапаровдун өмүр баяны
Президенттин сайтында Садыр Жапаровдун расмий өмүр баяны жарыяланды.
1968-жылы 6-декабрда Ысык-Көл облусунун Түп районундагы Кең-Суу айылында туулган.
Билими жогорку. 1991-жылы Фрунзе шаарындагы Дене тарбия жана спорт институтун аяктаган. 2006-жылы Б. Н. Ельцин атындагы Кыргыз-Россия Славян университетин аяктап, "юрист" адистигине ээ болгон.
Эмгек ишмердүүлүгү:
- 1986–1987-жж. - Ысык-Көл облусунун Түп районундагы "Санташ" колллективдүү чарбасынын жетекчиси;
- 1987–1989-жж. - Советтик Армиянын катарында кызмат өтөгөн;
- 1989–1995-жж. - Ысык-Көл облусунун Түп районундагы "Санташ" колллективдүү чарбасынын жетекчиси;
- 1996–2000-жж. - Ысык-Көл облусунун Түп районундагы "Солтонкул" дыйкан чарбасынын төрагасынын орун басары;
- 2000–2002-жж. - "Гузель-МХААД" ЖЧК башкы директору;
- 2002–2005-жж. - "Нурнефтегаз" ЖЧК башкы директору;
- 2005–2007-жж. - Кыргыз Республикасынын III чакырылыштагы Жогорку Кеңешинин депутаты;
- 2007-2009-жж. - Кыргыз Республикасынын Президентинин кеңешчиси;
- 2008–2009-жж. - Улуттук коррупциянын алдын алуу боюнча агенттиктин комиссары;
- 2009–2010-жж. - Кыргыз Республикасынын Мамлекеттик кадр кызматына караштуу Коррупциянын алдын алуу боюнча агенттиктин директору;
- 2010–2013-жж. - Кыргыз Республикасынын V чакырылыштагы Жогорку Кеңешинин депутаты;
- 2020-жылдын октябрь айынан тартып - Кыргыз Республикасынын Премьер-министри, Кыргыз Республикасынын Президентинин милдетин аткаруучу.
- 2021-жылдын 28-январынан тартып - Кыргыз Республикасынын Президенти.
Президенттин өмүр баянындагы карама-каршылыктар
Бирок айрымдар президенттин өзүнүн расмий өмүр таржымалында дал келбестиктерди табышкан. Биринчилерден болуп депутат Дастан Бекешев андан күмөн санады. Ал 2006-жылы КРСУнун юридикалык факультетин бүтүргөнүн, Садыр Жапаров өңдүү бүтүрүүчүнү университеттин студенттеринин катарынан байкабаганын жазган. Депутат президенттин КРСУдагы группалаштарына кайрылып, ага жооп берип коюуну суранды.
Андан ары, Kaktus.media сайтынын окурмандары Дене тарбия институтунда окуган жылдардагы эки ача пикирди байкашкан.
Садыр Жапаров 1987-жылы Дене тарбия институтунун 1-курсунан кийин аскерге кеткен. Новосибирск облусунун Коченево айылында Кызыл Жылдыз байланыш полкунун 235- Таллин ордендүү №57849 аскер бөлүгүндө кызмат өтөгөн. Ал жерден радиотелеграф бөлүмүнүн башчысы кызматына чейин көтөрүлүп, "Советтик армиянын отличниги" төш белгиси менен сыйланган. 1989-жылы армиядан келгенден кийин институтта окуусун уланткан.
Ал эми расмий өмүр баянда 1991-жылы Дене тарбия институтун артыкчылык диплому менен аяктаганы жазылган.
Бул окурмандарга суроо жаратты. Ошол жылдары институттун машыктыруучу-педагогикалык факультетинде окуу беш жыл, сырттан окуу алты жыл болгон. Ал эми 1-курсту жана эки жылдык тыныгууну (1987-1989) жана 1989-жылы окууну калыбына келтирүүнү эске алганда Садыр Жапаровдун иш жүзүндө үч жыл гана окуган: 1986-1987, 1989-1990, 1990-1991.
Ошондо президент үч жыл окуп диплом алганбы деген суроого президенттин басма сөз кызматы комментарий бере элек.
