Равшан Жээнбековдун жардамчысына расмий айып коюлду
Саясатчы Равшан Жээнбековдун жардамчысы, активист Айсулуу Кудайбердиева Kaktus.media сайтына Улуттук коопсуздук боюнча мамлекеттик комитет ага расмий айып койгонун билдирди.
Активисттин айтымында, ал бир нече айдан бери УКМКнын кысымына жана куугунтугуна кабылган.
"УКМКдагы сурактар аяктады, эми мен шайлоодо Равшан Жээнбековго иштегениме байланыштуу соттолуучу катары сотко барам. Мага Кылмыш-жаза кодексинин 378-беренеси "Чек араны мыйзамсыз кесип өтүү" боюнча кылмыш иши козголгон", - деди ал.
Кудайбердиева бул айып анын 2019-жылы кыргыз-тажик чек арасынан төрт жолу өткөнүнө байланыштуу экенин айтты. "Мен анда официалдуу посттор аркылуу өткөм", - деп баса белгиледи Кудайбердиева.
Активист УКМКнын тергөөчүсү Алыйманов ага карата козголгон кылмыш ишин бурмалап, сотко өткөрүп берген деп эсептейт. Ал окуяны саясатчы Равшан Жээнбековдун ишмердүүлүгү менен байланыштырды.
Кудайбердиеванын иши боюнча соттук отурум бүгүн, 14-февралда Биринчи Май райондук сотунда болот.
Буга чейин Кудайбердиева УКМКга суракка чакырылып, үйүндө тинтүү жүргүзүлгөн.
