Семетей Талас уулу аны эмне себептен УКМКга алып келишкенин айтты (видео)
Журналист жана активист Семетей Талас уулу УКМКнын сурагынан чыкты.
Ал белгилегендей, кылмыш иши боюнча күбө катары алынып келинген. Активист анын суракка алынышы анын активдүү саясий позициясына байланыштуу деп эсептебейт.
"Мени бир иш боюнча күбө катары суракка чакырышкан. Учурда бул иш тергелип жатат. Бул кандайдыр бир саясий заказ деп ойлобойм. Алгач социалдык тармактарда саясий өңүттө активдүү чыкканым үчүн деп ойлогом. Бирок ага эч кандай байланышы жок экени белгилүү болду. Азыр бир иш боюнча чоң тергөө жүрүп жатат, мен ал жерде күбө болуп жатам. Башка маалымат бере албайм ", - деди ал.
Бул иш анын социалдык тармактардагы билдирүүлөрүнүн бирине байланыштуу экенин кошумчалады.
Анын үйүнөн диний тогуз китеп алынган. Аларда шектүү эч нерсе жок деп эсептейт. Китептер экспертизага берилди.
Активист ага эч нерсе коркунуч туудура албайт деп ишенет, ошондуктан ал адвокаттын кызматына муктаж эмес.
Сурактан кийин Семетей Талас уулу менен жолуккандардын арасында митингдердин белгилүү катышуучусу Жолдош Сыргаков да болгон.
Семетей Талас уулу журналисттерге колдоо көрсөткөндүгү үчүн ыраазычылык билдирип, маселени саясатташтырбоого чакырды.
Эске салсак, бүгүн эртең менен атайын кызматтын өкүлдөрү активисттин Ак-Ордо конушундагы үйүнө келишкен. Алар тинтүү иштерин жүргүзүп, Семетей Талас уулун алып кетишкен.
