Алымкадыр Бейшеналиев жабам деген 17 медициналык окуу жай кимге таандык. Тизме
Саламаттыкты сактоо министри Алымкадыр Бейшеналиев 17 медициналык университетти жаба турганын ишенимдүү билдирүүдө. Ал эми медициналык окуу жайларга тиешеси бар олигархтар министрди издеп жатканын айткан.
Бул медициналык окуу жайлардын ээси ким?
Эскерте кетсек, бул тизме алдын ала маалымат болуп саналат. Окуу жайлардын ишмердүүлүгү дагы текшериле турганын белгилейбиз.
1. Эл аралык "Ала-Тоо" университети (медицина факультети)
1996-жылы түзүлгөн. Анын уюштуруучулары эл аралык "Сапат" билим берүү мекемеси жана Билим берүү министрлиги.
Университетте жалпы медицина тармагы боюнча бир кафедрасы, бар медициналык факультети бар. Кыргызстандын жарандары үчүн ал жакта окуу жылына 3300 доллар, ал эми чет элдиктер үчүн 4000 доллар турат.
2. С.Тентишева атындагы Азия медицина институту
2005-жылы ачылган. Жалгыз негиздөөчүсү Эркин Тентишев. Институт атасы Саткынбайдын ысмын алып жүрөт. Ал жакта окуган студенттер негиздөөчүнүн атасынын медицина менен байланышы бар-жогун билишпейт. Азыр Эркин Тентишев президенттин Чүй облусундагы ыйгарым укуктуу өкүлү.
Институтта эки факультет - жалпы медицина жана стоматология бар. Окуу акысы кыргызстандыктар үчүн да, чет өлкөлүктөр үчүн да жылына 2000 доллар турат. Бирок ал жакта негизинен Индия менен Пакистандан келген студенттер билим алышат.
Институт бир нече жолу чыр-чатактын чордонунда калган. 2013-жылы ошол кездеги саламаттыкты сактоо министри Дамира Ниязалиева буга чейин аны жабууга аракет кылса, 2014-жылы Билим берүү министрлиги лицензияны токтотуп, окуучулар билим берүүнүн сапатына нааразы болгон.
3. Эл аралык медицина мектеби
Кыргызстандын Эл аралык университетинде түзүлгөн. Юстиция министрлигинин маалымат базасында анын негиздөөчүсү "Билим жана илимди колдоо" бейөкмөт уюму экени көрсөтүлгөн. Бул уюмдун уюштуруучулары үч адам – Саадат Аюпова, Раиса Казакбаева жана Туратбек Усупов. Ачык булактарда бул адамдар жөнүндө маалыматтар өтө аз.
Университеттин сайтында негизинен Индия, Пакистан, Түштүк Корея, АКШ, Улуу Британия, Орусия, Украина, Афганистан, Япония, Непал, Бангладеш, Түркия жана Сириядан келген студенттер билим алып жатканы айтылат. Магистратура, аспирантура бөлүмү да бар. 2020-2021 окуу жылы үчүн окуу акысы кирүү акысын жана ортомчулук кызматтарды эсепке албаганда 4,500 долларды түзөт. Ал жакка жалаң гана чет элдиктер кабыл алынат. Анткени бул система мектепте 12 жылдык билим берүүгө ылайыкталган. Ал эми Кыргызстанда андай эмес.
4. "Кыргызстан Эл аралык университети" ЭПК
osoo.kg маалымат базасы окуу жайдын директору Елена Савченко экенин көрсөтүп турат. Эки уюштуруучу бар – "Мультимедиялык дистанттык окутуу институту" жана "Билим жана илимди колдоо" уюму.
Ачык булактарда бул окуу жай тууралуу маалымат өтө аз.
Веб-сайттарда, социалдык тармактардагы баракчаларда жогоруда аталган окуу жай МУК алдындагы Медициналык мектеп экенин көрсөтөт. Бирок, МУК бул эки башка окуу жай экенин билдирди. "Кыргызстан эл аралык университети" менен байланышууга мүмкүн болгон жок.
5. "Салымбеков атындагы университет"
2019-жылы ачылган жана Аскар Салымбековго таандык. Университет медициналык адистиктерди гана окутат. Индиядан, Пакистандан келген студенттер үчүн иштелип чыккан. Анда бир семестр окуу 1250 доллар турат.
6. "Авиценна" Эл аралык медициналык институту
2019-жылы ачылган. Университетте фармакология, стоматология багыттары бар. Osoo.kg маалымат базасы анын директору Нусуретбек Райымбеков, ал эми уюштуруучулары Нусуретбек Райымбеков, Эркинбек Маматов жана Раза Али экенин белгилеген. Университет Тунгуч кичи районунда жайгашкан.
Ачык булактардан белгилүү болгондой, Нусуретбек Райымбеков "Авиценнадан" тышкары "Интеллект медицина" лицейине ээлик кылат.
Эркинбек Маматов "КАМЕК" клиникасынын ээси жана директору .
Раза Али тууралуу маалымат жок.
Веб-сайтта окуунун баасы көрсөтүлгөн эмес.
7. Евразия университети "Эл аралык медициналык университет"
Ал экс-депутат Кубанычбек Жумалиевдин үй-бүлөсүнө таандык. Бир нече жыл мурун аталган окуу жайдын директору болуп анын жубайы ырчы Роза Аманова иштесе, учурда мекемени Эсен Салиев жетектейт.
Университеттин негиздөөчүсү имараттарды ижарага алып иштеткен "Аструм-Берекет" ишканасы болуп саналат. Компания Кубанычбек Жумалиевдин уулу Султан Мырзабековго таандык. Университет Анкара 17/1 дарегинде жайгашкан.
8. Эл аралык медициналык университет
Бул университет да Анкара, 17/1 дарегинде жайгашып, Кубанычбек Жумалиевдин үй-бүлөсүнүн "Аструм-Берекет" компаниясы менен байланышкан.
9. "Роэл Метрополитен университети"
Директору – Турдалы Токтоматов, уюштуруучулары – Турдалы Токтоматов, Шахзад Хуррам, Осмонбек Туманов жана "ИК медикал" ЖЧКсы. Ачык булактарда бул адамдар тууралуу маалымат аз.
10. "ABC академиясы"
2019-жылдын июль айында түзүлгөн, 2020-жылдын март айында Билим берүү министрлигинен лицензия алган. "Медициналык бизнес" багытында сабак беришет. Мекеменин алты уюштуруучусу бар: Эльмира Исмаилова, Садагүл Дүйшөналиева, Асел Текебаева, Диляра Салимова, "Берекет" ЖАК жана "Профессор Асымбекованын клиникасы" ЖЧКсы. Ал эми мекеменин директору Эдил Асимбеков. Ал министрлер кабинетинин мурдагы жетекчиси Шамил Асымбеков менен мурдагы вице-премьер-министр Гүлнара Асымбекованын тууганы, профессор Асымбекованын клиникасынын ээси.
11. Эл аралык медицина жана илим университети
Университетти Али Ихсан жана "Софит Строй" курулуш компаниясы негиздеген. Бул университет тууралуу толук маалымат жок.
12. Эл аралык илим жана бизнес университети (Медицина факультети)
Директору Асаналы Кулуев. Уюштуруучулары – "Каганат" кайрымдуулук фонду жана автоунааларды оңдоо менен алектенген "Дараж-Инвест" ЖЧКсы. Компания Болот Акматовго таандык.
Белгилей кетсек, бул университет студенттерине билим гана эмес, ипотекага батир да сунуштаган.
Буга чейин "Азаттык" радиосу Бишкектеги Эл аралык илим жана бизнес университети 2016-жылы ачылганын кабарлаган. Университет эски "Электротехника" заводунун короосундагы ремонттолгон имаратта жайгашкан. Окуу жай бизнес, экономика жана медицина боюнча сабак берет. Окуу акысы болжол менен $ 2,900 турат.
2018-жылы Билим берүү министрлиги талапка жооп бербегендиктен лицензияны кайтарып алууга аракет кылган.
13. Бишкек эл аралык медициналык институту
Директору - Турсун Мамырбаева. Университеттин алты уюштуруучусу бар: экс-депутат Альфия Самигуллина, БНИЦТиОнун жетекчилери Памир Муратов, Сергей Агарин, Аида Рахимдинова, Акылбек Иманкулов, Салима Ярова, Юсуф Яров, Нурсултан Оторбаев.
14. Жалал-Абад шаарындагы илимий-изилдөө медициналык-социалдык институту
Директору - Жаныбай Арынбаев. Институттун тогуз уюштуруучусу бар. Алардын төртөө – Айтурган, Исхак, Эрбол жана Бегимай Зулпукаровдор. Бир кезде Ахмат Бакиевдин жакын адамы болгон Муктарбек Зулпукаровдун балдары. Калган тең негиздөөчүлөр – Сооронбай Жээнбековдун жээни Айжамал Кантөрөева, Эрзат Арынбаев, Элеонора Эшатова жана "Симба" билим берүү борбору.
Бул институтта "медициналык бизнес" багыты боюнча окуунун баасы 75 миң сомду түзөт.
15. Кара-Балтадагы Кыргыз медициналык-стоматологиялык институту
Директору - Саяра Музуруханова. Уюштуруучусу Мухаббат Токомбаевага таандык Н.И.Пирогов атындагы медициналык колледжи.
16. Ош Эл аралык медициналык университети
Окуу жайдын директору Бибигул Орунбаева. Университеттин төрт негиздөөчүсү бар: Мухаммад Шоиб Шахид Нур Мухаммад, Рамил Мингазиев, Кымбат Өмүрзакова, Саид Ахмад Мухаммад Васим. Ачык булактарда бул адамдар тууралуу маалымат аз.
17. Адам Университети (Медицина факультети)
Бул Бишкек Финансы-Экономикалык Академиясы деп өзгөртүлгөн. Оsoo.kg маалымат базасы университеттин эки негиздөөчүсү бар экенин көрсөтүп турат - Жылдыз Сопубекова жана Сарвар Гулам Мужтаба Чаудкары Гулам Сарвар.
Университеттеги багыттардын бири медицина. Бул факультетте билим алуу 49 миң сом турат.
