Украина окуялары Кыргызстандын экономикасына таасирин тийгизеби? Министрликтен жооп
Украинадагы соңку окуялар Кыргызстандын соода балансына эч кандай таасирин тийгизбейт. Бул тууралуу Экономика жана коммерция министри Данияр Амангелдиев бүгүн, 26-февралда Бишкекте өткөн маалымат жыйынында билдирди.
Министр белгилегендей, Украинадан Кыргызстанга азык-түлүктүн айрым түрлөрү, атап айтканда, канаттуулардын эти жеткирилет. "Бирок быйыл ал импорттун ордун ата мекендик өндүрүш түзүүдө", - деди ал.
Амангелдиев Кыргызстандагы канаттуулардын этин кайра иштетүүчү үч завод, ошондой эле дагы бир ишкананын курулушу боюнча токтолду.
Эске сала кетсек, 24-февралда Россиянын президенти Владимир Путин Донбасста атайын операция башталганын жарыялаган. Ал эми 25-февралда Украинанын президенти Владимир Зеленский Путинди "адамдардын өлүмүн токтотуу" үчүн сүйлөшүү үстөлүнө чакырды. Россия Федерациясынын президентинин басма сөз катчысы Дмитрий Песков Путин сүйлөшүүлөрдү Минскиде өткөрүүнү сунуштап жатканын билдирди.
