Байсалов: Кыргызстан дагы 3 миң жыл БУУга мүчө бойдон калат
Эдил Байсалов Бириккен Улуттар Уюмунун 2023-2027-жылдарга Туруктуу өнүктүрүү боюнча кызматташуунун негиздеринин бет ачарында сөз сүйлөдү. Бул тууралуу министрлер кабинетинин басма сөз кызматы билдирди.
"Биздин өлкө БУУнун мүчөсү болгонуна 30 жыл болду жана бул убакыттын ичинде биз жарандардын жаңы муунун тарбияладык. Биз жаш, сыймыктанган жана алдыга ишенимдүү караган өлкөбүз. Калкыбыздын үчтөн экисинен ашыгы отуз жашка чейинкилер. Ошондуктан, эгемендүүлүктүн алгачкы отуз жылдык тажрыйбасын белгилеп, элибиз өзүнүн эгемендүүлүгүн жана мамлекеттүүлүгүн жогору баалап, жакынкы үч миң жылда БУУга мүчө болуп кала берерин ачык айтышыбыз керек", - деди Байсалов.
Ал жакынкы жылдарда Кыргызстандагы БУУнун агенттиктеринин ишинде ийкемдүүлүктү көрсөтүү жана биринчи кезекте республиканын жетекчилиги тарабынан бекитилген өлкөнү туруктуу өнүктүрүү программасынын артыкчылыктарын колдоо керектигин баса белгиледи.
Эске салсак, бүгүн, 2-мартта министрлер кабинетинин жетекчилигинин, мүчөлөрүнүн жана Бириккен Улуттар Уюмунун (БУУ) системасынын бардык бөлүмдөрүнүн өкүлдөрүнүн катышуусунда ЮНДАФтын Стратегиялык координациялык комитетинин жыйыны өтүүдө.
