Бейшеналиев акыркы жаңжал тууралуу: Мен дагы эмоционалдуу боло берем

Бүгүн, 10-мартта Алмазбек Исманкулов атындагы көздүн микрохирургиялык ооруканасындагы жаңжал боюнча саламаттыкты сактоо министри Алымкадыр Бейшеналиев: "Эгер сөз Саламаттыкты сактоо министрлигине тиешелүү болсо, мен дагы эмоционалдуу боло берем", - деп билдирди.

Эске салсак, министр жеке клиниканы ал жерден чыгаруу үчүн келип, Бишкектеги No2 клиникалык көп тармактуу оорукананы пайдаланууга берген.

Саламаттыкты сактоо министрлигинин башчысы оорукананын мурдагыдай иштеп жатканын көргөндөн кийин Исманкуловго телефон чалдырып, "Ай, лопух, мен сени канча күндөн бери издеп жүрөм. Үч сааттын ичинде бошотуп бербесең, чоң проблемага туш болосуң" - деп жинденген. Ушундан кийин ал клиниканын кызматкерлерине жабдууларды алып салууга убакыт берип, кетип калган.

Саламаттыкты сактоо министрлигинин басма сөз кызматы окуя боюнча Бейшеналиевдин комментарийин жөнөттү.

"Бишкек шаарынын калкы үчүн жеткиликтүү керебет фонду абдан жетишсиз, бейтаптар профили боюнча ооруканага жаткыруу үчүн көпкө күтүүгө аргасыз. Бул оорукананын имаратын бошотуу боюнча иш баштаганыбызга туура бир ай болду. Бишкек шаардык мэриясы аталган клиника менен ижара келишимин бузган. Бардык мөөнөттөр бүттү, биз мындан ары күтө албайбыз, бейтаптарды дарылоо үчүн керебеттер керек. Күчтүү эмоционалдуулугум үчүн кечирим сурайм, бирок көптөгөн жеке ишкерлер көп жылдардан бери мамлекеттин мүлкүн пайдаланып, мамлекетке аз өлчөмдөгү акча төлөп жүргөнүнө нааразымын",- деди министр.

"Алар мамлекеттик казынага аз өлчөмдө акча төлөшүнө ишенем, эгер андай болбосо, алар бул имараттарды минтип кармашмак эмес. Дагы бир жолу белгилегим келет, эгерде бул мамлекетке жана Саламаттыкты сактоо министрлигине тиешелүү болсо, мен мындан ары да ошондой боло берем", - деди Саламаттыкты сактоо министри.

Башкы беттеги сүрөттө Алымкадыр Бейшеналиев No6 оорукананын башкы дарыгери Элмира Мукамбетова менен.