Жанар Акаев: Кыргызстанда жумуш жок, Россиядагы мигранттар келсе эмне кылат?
Депутат Жанар Акаев Россиядагы мигранттар Кыргызстанга кайтып келсе, министрлер кабинетинин кандай пландары бар экенине кызыкты.
Жогорку Кеңештин 10-марттагы жыйынында ал жарандар өз өлкөсүндө иштеп, жакындарына жакын болсо албетте жакшы болорун белгиледи. Бирок, анын айтымында, мамлекет миллиондогон адамдарды жумуш менен камсыз кыла албайт.
"Эгерде миңдеген жарандарыбыз кайтып келе баштаса, аларга жумуш ордун түзүп берүү планы барбы? Мүмкүн араб өлкөлөрү, Япония менен миграциялык кызматташса болобу, биз менен иштешеби?" - деп сурады Акаев.
Экономика жана коммерция министри Данияр Амангелдиев Тышкы иштер министрлигине дагы тапшырма берилип жатканын, Түштүк Корея жана Түркия менен миграциялык режимди жөнөкөйлөштүрүү боюнча иштеп жатканын айтты.
"Мигранттар массалык түрдө келе баштаса, ооба, бардыгын иш менен камсыз кыла албайбыз", - деп кошумчалады бөлүм башчы.
Ал белгилегендей, министрлер кабинети жаңы Салык кодексине өзгөртүүлөрдү киргизүүдө. Учурда жөнөкөйлөштүрүлгөн салык режиминде иштеген IT адистери салыктан толугу менен бошотулат деп болжолдонууда.
