Журналисттин өлүмүнө шектелген блогер СИЗОго жөнөтүлдү
Баткендин райондук соту блогер Батма Жолболдуеваны бир айга камакка алды. Бул тууралуу райондук соттун кызматкерлери билдиришти.
Белгилүү болгондой, 25-мартта Арзыгүл Галымбетова шаардын ИИБсине кайрылып, аны "Батма-бат" YouTube каналы аброюна шек келтирип, каралап жатканын маалымдаган.
Ошол эле күнү, 25-мартта Галымбетованын ден соолугу начарлап, ооруканага кайрылган. Ал эми кечки саат 20:00до неврология бөлүмүндө каза болуп калган. Бул факт "шалаакылыктын айынан өлүмгө жеткирүү" беренеси боюнча катталып, экспертизалар дайындалган болчу.
Анын өлүмүнө шектелип, 33-жаштагы Б.Ж. (Батма Жолболдуева. - Kaktus.kg'нин эскертүүсү) кармалып, убактылуу кармоочу жайга киргизилген. 29-мартта Баткендин райондук сотунун судьясы Жолболдуеваны Жалал-Абаддын СИЗОсуна 2022-жылдын 26-апрелине чейин камакка алуу бүтүмүн чыгарган.
