"Жаңы көрүнүш". Нуржигит Кадырбеков эркектерге жасалган зордук-зомбулукка таң калды
Депутат Нуржигит Кадырбеков жарандарды үй-бүлөлүк жашоого даярдоо курстарын ачууну сунуштоодо. Бул тууралуу ал бүгүн, 6-апрелде Жогорку Кеңештин жыйынында билдирди.
Анын айтымында, башкы прокурор Курманкул Зулушев бир күн мурун отчет берип жатып, бир жыл ичинде 10 миң 151 үй-бүлөлүк зомбулук фактысы катталса, 311 факты эркектерге карата болгон.
"Бул кандай болот, мен муну түшүнгөн жокмун, бирок бул кандайдыр бир жаңы көрүнүш (феномен). Маселени системалуу түрдө чечишибиз керек. Кризистик борборлор ачылып жатат. Бирок кризис бул кризис. Алардын атын башкача, балким бактылуулук борборлору же чечим борбору деп өзгөртүү керекпи?
Мектептерде жарандарды үй-бүлөлүк жашоого даярдоо боюнча сабактар киргизилиши керек окшойт. Менталдык арифметика, математика, тил курстары боюнча курстары сыяктуу эле үй-бүлөгө даярдоо курстарды ачуу керек", - деди Кадырбеков.
