"Мамлекет жарандарга карыз эмес". Байсалов пенсия боюнча айткан сөзүнө түшүндүрмө берди
Эдил Байсалов "Ала-Тоо 24" телеканалында маек куруп жатып, Жогорку Кеңеште пенсия реформасы талкууланып жатканда айтылган "Мамлекет жарандарга эч кандай карызы жок" деген сөзүнө комментарий берди.
Ал СССРдин тушунда мамлекет калкты максималдуу иш менен камсыз кылгандыгын белгиледи. Жарандар пенсияга ишене алышкан. Бирок азыр абал башкача. Байсаловдун айтымында, жарандар келечектеги пенсиясына алдын ала кам көрүү керек.
""Мамлекет эч кимге милдеттүү эмес" деген сөз пенсияга тиешелүү. Мурда ар бир жаран пенсияга чыгып, кандайдыр бир суммага ишене алчу. Бирок азыр андай эмес. Тажрыйбасы жок, 30 жыл салым кошпогондор көп. Алар 1,5 миң сом пенсия алышат. Бул өтө эле аз, пенсия деп атоого да болбойт. Карылык боюнча жөлөкпул десе болчудай. Албетте, жалгыз, эч нерсеси жок, ачарчылык коркунучуна кабылган адамдарды мамлекет таштабайт, ага каражат бөлүп берет, бирок аны пенсия деп айтууга болбойт", - дейт ал.
