УКМК "Өлбөс полктун" жүрүшүнө Z тамгасы бар аскер формасын кийбөөгө чакырды
9-майда Улуу Жеңиш күнү майрамдалат. Буга байланыштуу УКМК шаардыктарга кайрылып, Z тамгасы бар аскер формасын кийбөөгө жана ошондой форманы ижарага бербөөгө чакырды. Бул тууралуу ведомствонун басма сөз кызматы билдирди.
"Улуттук коопсуздук кызматынын органдары карнавал костюмдарын ижарага берген мекемелерге кайрылып, Z символикасы бар аскер формаларын прокатка бербегиле деп суранат. Мындай белгилер улуттар арасындагы араздашууну жаратат. Жалпы эле шаардыктарга да кайрылып, 9-майда, Улуу Ата Мекендик согуштагы Жеңиш күнүндө, "Өлбөс полктун" жүрүшүндө жогоруда айтылгандай форманы кийбөөгө үндөйт", - деп кайрылууда айтылган.
УКМК КРдин мыйзамы боюнча, улуттар арасындагы кастыкты козутууга багытталган иш аракеттер үчүн жоопкерчиликке тартыла тургандыгын эскертет.
