Бекешев: Президенттин казино боюнча демилгесин колдойм, бирок жанындагыларды колдобойм
Жогорку Кеңеште оюн-зоок ишмердүүлүгүн мыйзамдаштыруу боюнча мыйзам долбоору каралууда. Журналисттер залдан чыгарылгандан кийин айрым депутаттар маселени жалпыга маалымдоо каражаттарынын өкүлдөрүнүн катышуусунда талкуулоону сунуштап, журналисттердин катышуусуна уруксат берилди.
Депутат Бактыбек Чойбеков экономикада абал оор болгонуна байланыштуу депутаттар бардыгын туура түшүнүп жатканын белгиледи.
"Бирок парламенттик угууларды өткөрүү керек болчу, туура жол менен кетсе болот", - деди ал.
Дастан Бекешев бул долбоор министрлер кабинетинде жазылбаганын жана аны кимдер активдүү колдоп жатканын билерин айтты.
"Тилекке каршы, президенттин жанында эки жолу ката кетиргендер бар. Бул мыйзам долбоору ыйык Орозо айында демилгеленди. Аларды эчак эле кызматтан алыш керек эле.
2011-жылы Садыр Жапаров депутат катары кумаркананы жабууга добуш берген. Ал эми азыр президент катары өлкөгө киреше керек экенин түшүндүрүп жатат. Мен анын чет элдиктер үчүн гана казино ачылат деген идеясын колдойм. Онлайн казинолор - мыйзамдагы бул нерсе кийинчерээк эч нерсе төлөбөш үчүн атайын жасалган. Муну мыйзам долбоорунан алып салуу керек.
Оюн автоматтары балдар үчүн жеткиликтүү. Ал жактан биздин жаран ойноп жатканын же чет өлкөлүк же такыр эле жаш бала экенин аныктай албай каласыз. Ошондуктан, оюн автоматтарын да алып салуу керек.
Мусулман өлкөлөрүндө да казинолор бар, бирок бул алардын жаман болуп калды дегенди билдирбейт. Ошондуктан президент ыймандуу болбой калды деген туура эмес. Мен президентти колдойм, бирок анын тегерегине отуруп алып, макул болуп, туура жазыптыр дегендерди колдобойм", - деди Бекешев.
