Президент казино боюнча мыйзамга кол койду
Бүгүн, 30-июнда президент Садыр Жапаров "Кыргыз Республикасындагы кумар оюндары жөнүндө" мыйзамга кол койду. Бул тууралуу президенттик аппараттын басма сөз кызматы билдирди.
Ошол эле учурда Жапаров кумар оюндарына байланыштуу айрым мыйзам актыларына кол койду.
Белгилей кетсек, 22-июнда Жогорку Кеңештин депутаттары 2012-жылдан бери жабылып калган казино, оюн автоматтары жана лотереяларды мыйзамдаштыруу боюнча мыйзам долбоорун колдошкон.
Министрлер кабинетинен билдиришкендей, мыйзам долбоорунун максаты инвестиция тартып, мамлекеттик бюджетке кошумча ресурстарды тартуу болуп саналат.
Министрлер кабинетинин төрагасы Акылбек Жапаровдун айтымында, лицензиянын баасы 1 миллион доллардан 1,5 миллион долларга чейин болот. Мыйзам бузулган учурда лицензиясынан жана акчасынан ажырайт.
Мыйзамга ылайык, Кыргыз Республикасынын жарандары, 21 жашка чыга элек чет өлкөлүк жарандар, компетенттүү эмес чет өлкөлүк жарандар оюн-зоок жайларынын кардары боло алышпайт.
