Көл суусуна союлган малдын калдыктары кошулуп жаткан жай аныкталды
Жети-Өгүз районунда сууну булгап жаткан мал союлучу жай аныкталды. Бул туурасында Kaktus.kg сайтына Ысык-Көл облустук ички иштер башкармалыгынан билдиришти.
Маалыматка караганда, 25-июлда туристтик- экологиялык милициянын кызматкерлери Ысык-Көл айылында жакында эле ачылган мал союучу жайды аныкташкан.
Текшерүү учурунда союлган малдын калдыктары түтүкчө аркылуу агын сууга агып, ал болсо Ысык-Көлгө кошулары аныкталды.
Касапкананын ээси 32 жаштагы С.Ж`нын айтымында, өзү баккан малды союп, этин сатуу менен алектенет. Союлган малдын калдыктары үчүн атайын чуңкур жасалган. Бирок жакында суу көтөрүлүп малдын калдыктары сууга агып кеткендигин түшүндүргөн.
Учурда Жети-Өгүз РИИБдин тергөө кызматы тарабынан кийинки юридикалык баа берүү менен текшерүү иштерин жүргүзүүдө.
