Эгемендүүлүк күнү салют атылабы? Министрликтин жообу
Кыргызстандын Эгемендүүлүк күнүндө кандай иш-чаралар өтөөрүн Маданият, маалымат, спорт жана жаштар саясаты министрлиги билдирди.
Бүгүн, 25-августта Бишкекте өткөн маалымат жыйынында министрдин орун басары Салтанат Аманова мамлекеттик майрамды белгилөө республиканын бардык жети облусунда, борбордо жана Ошто өтөрүн жана бүгүн башталаарын билдирди.
Анын айтымында, негизги иш-чаралар 31-августта Чүй облусунун Аламүдүн районундагы Чуңкурчак жайлоосунда өтөт. Бул күнү саат 10:00дө республиканын мамлекеттик желеги ачылып, жүрүш болот. Ал жерде чоң этноайыл түзүлүп, ага өлкөнүн бардык аймактарынан миңден ашык адам катышат. Түшкү саат 08:00дө Байтик айылында ат чабыш боюнча жеңүүчүлөргө сыйлыктар тапшырылат. Ал эми катышуучуларды каттоо саат 08:00дө башталат.
Мындан тышкары, Аманованын айтымында, Чуңкурчакта "Ынтымак" фестивалы өтүп, анда улуттук кийимдер, тамак-аштар көрсөтүлүп, боз үйлөрдү тез чогултуу боюнча сынак жана гала-концерт болот.
Көк бөрү боюнча кубок Нарын облусунда өтөт. 30-31-августта Улуттук филармонияда кыргыз-казак акындарынын айтышы өтөт.
"Бишкекте иш-чаралар эртеден кечке болот. Ала-Тоо аянтындагы майрамдык салтанат саат 19:00дө башталат. Ата мекендик эстрада жылдыздарынын жана башка мамлекеттердин жылдыздарынын катышуусунда эки сааттык концерт болуп, концерт салют атуу менен аяктайт", - деп белгиледи министрдин орун басары.
