Таласта аялын өлтүргөнгө шектелген инспекторго сот өкүм чыгарды
Таласта аялын өлтүргөнгө шектелген жол кайгуул кызматынын инспекторуна сот өкүм чыгарды. Облустук соттун басма сөз кызматынан Kaktus.kg`ге кабарлашкандай, айыпталуучу 12 жылдан ашык убакытка эркинен ажыратылды.
"26-августта Талас шаардык соту Ж.А.К`ны 122-берененин 2-бөлүгүнүн 7-пункту менен (адам өлтүрүү) күнөөлүү деп таап, 12 жыл 6 айга эркинен ажыратты. Анын үй-мүлкү конфискацияланган жок. Айыпталуучу жазасын жалпы тартиптеги түзөтүү абагында өтөйт", - дешти соттон.
Белгилей кетсек, окуя 2021-жылы 29-декабрында болгон. Анда 1992-жылы туулган келиндин каза болуп, денесин кароо учурунда уур-токмоктун издери бар экени такталган. Кийинчерээк кылмышка шектелип маркумдун күйөөсү кармалган. Шектүү 1988-жылы туулган Ж.А., Талас ОИИБнин жол кайгуул кызматкери экени белгилүү болгон.
Кылмыш иши боюнча тиешелүү материалдар 18-майда соттун кароосуна жиберилген.
