Токаев Казакстанда президенттик шайлоону мөөнөтүнөн мурда өткөрүүнү сунуштады
Бүгүн, 1-сентябрда казак президенти Касым-Жомарт Токаев Казакстанда мөөнөтүнөн мурда президенттик шайлоо өткөрүлөрүн айтты. Бул тууралуу Казакстандык басылмалар жазып чыгышты.
"Мен үчүн мамлекеттин кызыкчылыгы баарынан жогору турат. Ошондуктан мен кызматтык мөөнөтүмдү кыскартып, мөөнөтүнөн мурда президенттик шайлоого барууга даярмын. Көп ойлонуп, президенттик мөөнөттү кайра карап чыгуу керек деген тыянакка келдим. 7 жылдык бир мөөнөт менен чектөөнү сунуштайм. Бирок кайра шайланууга тыюу салынат", - деди президент.
Касым-Жомарт Токаев белгилегендей, азыркы геосаясий шарттарда Казакстан мамлекеттүүлүгүн ырааттуу бекемдеп, реформалардын жана жаңылануулардын багытын бекем карманышы керек.
Бул үчүн алдыдагы шайлоо маанилүү.
"Белгилүү болгондой, кийинки президенттик шайлоо 2024-жылы, парламенттик шайлоо 2025-жылы өтүшү керек. Мен жаңы стратегияга ылайык негизги мамлекеттик институттарды комплекстүү түрдө калыбына келтирүүнү баштоо зарыл деп эсептейм. Менин сунушум бийликти монополиялаштыруу тобокелдиктерин бир топ азайтат. Жаңы президенттик система саясий туруктуулукту, казакстандык моделдин жана коомдук түзүлүштүн туруктуулугун бекемдейт", - деди Касым-Жомарт Токаев.
