ЖККУ: Кынынан кылыч сууруп жаткан жокпуз, тынчтык жолу менен чечүүгө аракет кылабыз
ЖККУ Армения менен Азербайжандын, ошондой эле Кыргызстан менен Тажикстандын чек араларындагы чыр-чатакты тынчтык жолу менен чечүүгө аракет кылууда, деп билдирди уюмдун Армениядагы миссиясынын алдыңкы тобунун башчысы, генерал-полковник Анатолий Сидоров.
Анын айтымында, эки чек арада ЖККУ үчүн жагымсыз кырдаал түзүлдү. Ошол эле учурда уюмдун уставында да, башка документтерде да, Жамааттык коопсуздук келишиминин өзүндө да саясий жана дипломатиялык ыкмаларга артыкчылык берилгени жазылган.
"Биз азырынча кынынан кылыч сууруп жаткан жокпуз жана мүмкүн болушунча маселелерди тынчтык жолу менен чечүүгө аракет кылып жатабыз", - деп баса белгиледи Сидоров.
Ал бул багыттагы иштер ийгилик менен аяктайт деген ишенимин билдирди.
Генерал 17-сентябрда кагылышуу болгон аймактарды, ошондой эле ок атууга кабылган армян тараптын позицияларын кыдыруу негизги милдет экенин айтты.
"Биз мүмкүн болушунча объективдүү болууга аракет кылып жатабыз, андыктан фактылардын үстүнөн иштейбиз. Кандайдыр бир тыянак тууралуу айтууга али эрте, жалпысынан бул иштин жыйынтыгы боюнча жалпы отчетко киргизилет", - деп түшүндүрдү.
