Жогорку Кеңештин комитети кыргыз-өзбек чек арасы боюнча келишимди жактырды
10-октябрда Жогорку Кеңештин Эл аралык иштер, коргоо, коопсуздук жана миграция боюнча комитети Кыргызстан менен Өзбекстандын чек арасы боюнча келишим долбоору боюнча чечим кабыл алды. Депутаттар чечимди жабык эшик артында кабыл алышты.
Кийинчерээк президенттин парламенттеги өкүлү Алмасбек Абытов журналисттерге билдиргендей, комитет мүчөлөрү Кемпир-Абад суу сактагычынын астындагы 4 миң 485 гектар жерди Өзбекстанга өткөрүп, ал эми Кыргызстан 19 миң 699 гектарды ала турган келишимдин долбоорун жактырды.
УКМКнын төрагасы Камчыбек Ташиевдин айтымында, суу сактагычта биргелешкен ишкана түзүлүп, анда Өзбекстан менен Кыргызстандан сегиз киши иштейт.
Комитет төрагасы Чыңгыз Айдарбеков Кыргызстан менен Өзбекстандын чек арасын делимитациялоо боюнча келишим долбоору коомдук талкуулоо регламенттин алкагында өткөнүн билдирди.
Анын айтымында, чечим кабыл алынганда депутаттардын пикирлери экиге бөлүнгөн. "Добуштар: 6 - макул, 4 - каршы. Мен каршы добуш бердим", - деди депутат.
Ал кошумчалагандай, парламент келишимди ратификациялоо маселесин Кыргызстан менен Өзбекстандын президенттери долбоорго кол койгондон кийин карайт.
