"Кыргызстан сулуусу-2022" Диами Алмазбекова: Мосвкада идиш, пол жууп иштегем
"Кыргызстан сулуусу-2022" сынагында 24 кыздын ичинен суурулуп чыгып таажы тагынган Диами Алмазбекова Kaktus.kg сайтына маек курду. Өлкөнүн ажарлуу кызы деп табылган Диами өзү, ата-энеси, кесиби боюнча күйөрмандарынын кызыгуусун жараткан суроолорго жооп берди.
Аты-жөнү - Диана Алмазбекова. 2001-жылы Жалал-Абад облусунун Чаткал районунда төрөлгөн. Үй-бүлөдө эки бир туугандын кенжеси.
"Айылда, жөнөкөй үй-бүлөдө эле чоңойгом. Стюардесса болом деген кыялым бар болчу. Мектепти аяктагандан кийин ошол багытта билим алайын десем кабыл алуу токтоп калыптыр. Ошондо окууга болгон кызыгуум жоголуп кетти. Апам мугалим болгондуктан "кызым билим ал" деп Кыргызстан эл аралык университетине сырттан окуу бөлүмүнө тапшырткан", - дейт Диами.
Ал мектепти аяктагандан кийин, башкача айтканда, 17 жашында өз алдынча модель катары иштеп баштаганын айтат.
"Өз алдынча эле моделдик тармакка аралашып, иштеп баштадым. Күнүнө 700 сом айлык алчумун. Кийин моделдик ккесипти Россиядан улантайын деп ал жакка бардым. Бирок ойлогон ойлорума дароо эле жеткен жокмун. Кыйынчылыктардан өттүм, башында идиш, пол жууп иштеп жүрдүм. Ошентип жатып моделдик тармакка аралашып, кийим дүкөндөр менен иштешип, бүгүнкү күнгө чейин кызматташып келе жатам", - деди ал.
