Кемпир-Абад боюнча кармалгандардын айрымдары 2023-жылга чейин камакта калтырылды
Кемпир-Абад маселеси боюнча кармалгандардын айрымдарынын камактагы мөөнөтү 20-февралга чейин узартылат. Бул туурасында 9-декабрда жактоочу Канат Хасанов маалымат жыйында билдирген.
Ошол эле күнү (9-декабрь) Биринчи Май райондук сотунда Азимбек Бекназаров, Илгиз Шаменов жана Орозайым Нарматованын камактагы мөөнөтүн узартуу боюнча отурум болгон.
Ага ылайык, Азимбек Бекназаровдун камактагы мөөнөтү 2023-жылдын 23-февралына чейин узартылган.
Орозайым Нарматова 2023-жылдын 20-февралына чейин камакта калтырылган.
Ал эми Илгиз Шаменов боюнча процесс жылдырылган эле. Бүгүн, 12-декабрда Биринчи Май райондук сотунда процесс улантылууда. Ага ылайык, Илгиз Шаменов 2023-жылдын 20-февралына чейин камакта калтырылды.
Андан тышкары активист Акыл Айтбаев, Чыңгыз Капаров жана үй камагына чыгарылган Нурлан Асанбеков дагы 2023-жылдын 20-февралына чейин камакта болот.
Эске салсак, 23-октябрда опозиция саясатчылары, активисттер коомдук баш аламандыкты жаратууга шектелип кармалган. Андан бир күн мурун Кемпир-Абад суу сактагычын колдоо боюнча комитет түзүлгөн.
27-октябрда кармалган активисттер соттун чечими менен эки айга СИЗОго киргизилген.
