Депутат Өмүрбек Бакировдун мандатынын мыйзамдуулугу текшерилет
Бишкек шаардык административдик соту Өмүрбек Бакировдун депутаттык мандатынын мыйзамдуулугун кароо чечимин чыгарды. Бул тууралуу Kaktus.media сайтына депутат өзү билдирди.
Анын айтымында, буга чейин экс-депутат Равшанбек Рысбаев сотко арыз менен кайрылган.
"Ал мага берилген мандатты кайра карап чыгууну талап кылган. Иш соттун үч инстанциясынан өтүп, мандатты мыйзамдуу алганым далилденди. 12-декабрда шаардык сот анын арызын кайра кароо чечимин чыгарган. Бул иш боюнча териштирүү болот", - деди депутат.
Бакиров белгилегендей, ушундай жол менен "ыңгайсыз депутаттарды"мандаттан ажыратууга болот.
"Мен бул чечим боюнча даттанууга ниеттенип жатам", - дейт Бакиров.
Мыйзамга ылайык, шайлоо өткөндөн кийин үч күндүн ичинде шайлоо боюнча даттанууга болот. Кошумчалай кетсек, шайлоодон бир жылдан кийин чечим кабыл алынат деген практика дүйнөнүн бир да жеринде жок.
