Гепатитке каршы эмдөө башталат. Тизмеде чач тарачтар, сулуулук кызматкерлери бар

2022-жылдын декабрь айында гепатиттин В түрүнө каршы эмдөө кампаниясы башталат. Бул туурасында Республикалык ден соолукту чыңдоо борборунан маалымдашты.

Гепатиттин В түрү - боорду жабыркатуучу кеңири таралган жана коркунучтуу жугуштуу оору. Эгер убагында дарылабаса циррозго өтүп кетет. Ага каршы эң эффективдүү коргоо бул- эмдөө.

Саламаттыкты сактоо министрлигинин буйругу менен калкты вирустук гепатитке каршы эмдөө боюнча максаттуу топтун тизмеси бекитилди. Ага ылайык, төмөнкү топтогулар эмделет:

• кан же кан толуктоочу азыктарды көп талап кылган адамдар, диализ менен ооругандар жана органдарын трансплантациялоочу реципиенттер;
• рак менен ооруган бейтаптар;
• кургак учук менен ооругандар;
• гемофилия менен ооруган бейтаптар;
• ВИЧ менен жашаган адамдар;
• менчигинин түрүнө карабастан саламаттык сактоо уюмунун кызматкерлери;
• гепатитке каршы эмдөөлөрдүн толук курсун бүтүрө элек жана В гепатити эндемикалык аймактарга баргандар (бул категориядагы адамдарга саякатка чыгаар алдында эмдөө сунушталат);
• эркиндигинен ажыратылган жайларда камалгандар;
• инъекциялык баңгизатын колдонуучулар;
• эркектер менен жыныстык катнашта болгон эркектер, трансгендерлер;
• өнөкөт вирустук гепатити бар адамдар, алардын үй-бүлө мүчөлөрү жана жыныстык байланышта болгон адамдар;
• коркунучтуу сексуалдык өнөктөштөрү бар адамдар;
• мамлекеттик социалдык тейлөө мекемесинин кызматкерлери (карылар үйлөрү, балдар үйлөрү, ымыркайлар үйлөрү, интернаттар жана башкалар);
• тейлөө кызматкерлери (чач тарачтар, сулуулук салондору, татуировка, хиджама жана башкалар);
• аскер кызматчылары (ички аскерлер, Ички иштер министрлиги, Улуттук коопсуздук мамлекеттик комитетине караштуу Мамлекеттик чек ара кызматы, Улуттук гвардия, Коргоо министрлиги жана башкалар);
• улуттук эмдөө графигинин алкагында вирустук гепатитке каршы эмдөөдөн өтпөгөн жарандар
• бардык университеттердин, колледждердин жана башка эквиваленттүү мекемелердин студенттери.

• Эмдөө Россияда чыгарылган "Регевак V" вакцинасы менен жүргүзүлөт.
• Вакцина жогорку иммуногендик.
• Вакцина универсалдуу. Аны жаңы төрөлгөн балдарга да, чоңдорго да колдонсо болот. Аны пландуу (вакцинациялоо графигине ылайык) жана шашылыш (инфекцияланган биоматериал менен байланышта болгон учурда) В гепатитинин алдын алуу максатында колдонсо болот.